خواطر واحد زهقان

·        لولا "الناس اللى نزلت التحرير" مكانش زمانك ليك حق الانتخاب... مكانش زمانك ليك حق اختيار من يقودك... انت مدين بهذا الحق للثورة يا كاره الثورة و شاتم الثوار...

·        لولا "الناس اللى نزلت التحرير" كان زمانك عاجلاً ام آجلا معرض لثورة "اسلامية" وقودها الاخوان المسلمين و السلفيين لتطبيق شرع الله... و ساعتها بقى أسوأ سيناريو ييجى فى بالك كان هيتحقق... ايران، افغانستان، وكل اللى قلبك يحبه...

·        لولا عدم دعمك لمن كان يطالب بحقه كاملاً لكنا فى موقف أفضل حالاً من الآن...

·        يا من تريد عودة الاخوان الى مكانهم الطبيعى فى السجون... انت لا تختلف شيئاً عنهم، فانت عنصرى و بغيض مثلهم تماماً... و بعدين يا اهبل هى السجون عملتلهم ايه... لم تقلل من تطرفهم او تغير من تفكيرهم... انظر الى عبود الزمر... قضى اكتر من نص عمره فى سجون مبارك... و طالع اوسخ مما دخل... و مش الحل برده يا بتاع الدولة المدنية المتحضرة اعدامهم فى الميادين العامة – زى ما هما هيعملوا معاك – عقوبة الاعدام يامن تريد النهضة ملغية فى كل الدول المتقدمة...

·        لو متضايق ان الاخوان معاهم اغلبة فى مجلس الشعب، معلش يا حبيبى... هى ديه الديمقراطية... و محدش قادر – لا شفيق و لا عمر سليمان – يسحب منهم ده دلوقتى... الناس ديه معاها شرعية... و شرعيتهم زى ما هى لحد الانتخابات الجاية... لحد ما الناس اللى ادوهم الشرعية ياخدوها منهم تانى... هى ديه الديمقراطية يا متعلم يا مثقف...

·        مقتنع ان الديمقراطية متنفعش مع شعب به اغلبية من الجهلة... الى حد كبير معاك حق... الديمقراطية يفشلها صوت ناخب واحد جاهل... بس تعالى قوللى... امتى الناس هتتعلم... و ادينى معاد نقدر نطبق فيه الديمقراطية... عزيزى الساذج... حاجتين... اولاً الديمقراطية ليست هبة للشعوب المتحضرة المتعلمة المثقفة الكيوت... الديمقراطية ثقافة و تعود تكتسبها بالممارسة... لازم تسيب الناس تختار... و تغلط و تختار تانى و تتحمل نتيجة اختياراتها أياً كانت... مع الوقت هيتعلموا... اكبر مثال على ده...   10 مليون صوت راحوا للاخوان فى مجلس الشعب، فى مقابل 5 مليون صوت فى انتخابات الرئاسة... الناس بدأت تتعلم... ادوها فرصتها للآخر... اطلعوا برة اسطورة المستبد العادل ديه.. ديه اسطورة يا بشر... مفيش بنى آدم على الارض فيه الصفتين دول... و محدش مهماً كان هيفكر يعلم الناس... لا شفيق و لا مرسى... الاتنين مستفيدين من جهل الناس.

·         بتلوم "الناس اللى نزلت التحرير" على ما نحن فيه الآن، لو عايزين الحق، الثوار اخطأوا كثيراً... و اكبر غلطة، و اكثرهم تأثيراً و اكثرهم حدوثاً بحسن نية هى الوثوق فى المجلس العسكرى... كان يجب ان ندرك جيداً نوايا المجلس يوم ان اصر على المشى فى سكة مبارك و تعديل بعض مواد الدستور... و يوم ما ادركنا ده و قولنا "يسقط يسقط حكم العسكر" الناس كلها وقفت قصادنا و قلتوا عايزين نوقع البلد و نسقط الجيش و نوديها فى داهية... لا يا حبيبى... البلد فعلاً رايحة فى داهية كل يوم فى الفترة الانتقالية... بسبب المجلس العسكرى و حكم العسكر، حكم العسكر اللى مش مجرد رئيس البلد يبقى منتمى للجيش... حكم العسكر ان نسبة تفوق ال60% من مناصب الدولة يشغلها لواءات سابقون... لضمان ولائهم للنظام... النظام اللى يعمل كدة يبقى نظام هش و اجوف و خايف على نفسه من الزوال...

·         نييجى بقى لمن يتحدث عن الخروج الآمن للشعب و الميل نحو الدولة المدنية بانتخاب شفيق... آسف جداً، و احب أطمنك انى كمان مش هنتخب مرسى، ديه فاشية و ديه فاشية، ده واحد هيطلع دين امك اكنك العسكرى المرمطون بتاعه – مع كامل احترامى للمجندين – و ده واحد برده هيطلع دين امك باسم الدين و ان اعتراضك على الحاكم حرام و الى آخره من اى موانع او حدود شرعية هيخترعها او يوظفها لمصالحه... شفيق مش انحياز للدولة المدنية، شفيق انحياز لدولة لا دينية مش بالضرورة تكون مدنية... و كونى واحد من المؤمنين بالحريات، مقدرش أدى صوتى لا لده ولا لده... الاتنين بالنسبالى وجهين لنفس العملة...
الثورة فعلاً قامت عشان دولة مدنية... ماشى... عشان كدة انا مش هقدر ادى صوتى لواحد تأسف لنجاح الثورة و يعتبر من قمت بالثورة عليه مثله الاعلى...  عشان كدة مش هدى صوتى لحد فيهم... و اللى يكسب يكسب... و محدش يقوللى ان بمقاطعتى – مع انى مش هقاطع، انا نازل ابطل صوتى و ديه تفرق كتير – كدة بلبس الناس... الناس اللى كارهة شفيق تقوللى انى كدة بلبسهم مع شفيق... و الناس اللى كارهة مرسى تقوللى انى كدة بلبسهم مع مرسى... لا معلش... من ثوابت النظام الديمقراطى اللى سمح لسعادتك انك تختار ان دايما فيه اختيار زيادة متاحلك و هو انك متخترش اصلاً... حقى و هستخدم الحق ده...

·         لو لبست متلمش غير نفسك انك لم تساند "الهوجة" اللى انا مسميها "ثورة" ديه من الاول... الكلام ده لليبرالى و الاسلامى مع بعض...